अकरावी प्रवेशाची अजूनही संधी

म. टा. प्रतिनिधी, पुणे
इयत्ता अकरावीतील प्रवेशासाठी पुणे आणि पिंपरी चिंचवड परिसरातील विद्यार्थ्यांना आणखी एक संधी मिळणार आहे. यासाठीची ऑनलाइन प्रवेशप्रक्रिया संपलेली असतानाही अनेक विद्यार्थी प्रवेशापासून वंचित आहेत. त्यामुळे त्यांना संधी देण्यासाठी उपसंचालक कार्यालयामार्फत १५ ते १७ ऑक्टोबरदरम्यान प्रवेशासाठी आणखी एक फेरी घेतली जाणार आहे.
अकरावी ऑनलाइन प्रवेश प्रक्रियेच्या अंतिम टप्प्यात आलेल्या तांत्रिक अडचणीमुळे अजूनही काही विद्यार्थी ज्युनिअर कॉलेजांमधील प्रवेशापासून वंचित राहिले असून, प्रवेशासाठी विद्यार्थी-पालकांना शिक्षण उपसंचालक कार्यालयाच्या चकरा माराव्या लागत आहेत. या विद्यार्थ्यांचे शैक्षणिक वर्ष वाया जाण्याची शक्यता असल्याचे वृत्त महाराष्ट्र 'टाइम्स'ने दिले होते. त्या पार्श्वभूमीवर हा निर्णय घेण्यात आला आहे. केंद्रीय प्रवेशप्रक्रियेच्या एकूण आठ फेऱ्या झाल्या होत्या. एकूण २९६ महाविद्यालयांमध्ये एक लाख चार हजार १३९ जागा उपलब्ध होत्या. आत्तापर्यंत फक्त ६७ हजार ९०२ विद्यार्थ्यांनी प्रवेश घेतला असून, ३६ हजार २३७ जागा रिक्त राहिल्या आहेत.
प्रवेश कसे देणार?
ज्या विद्यार्थ्यांनी अकरावी प्रवेशासाठी अद्याप कोणत्याही महाविद्यालयात प्रवेश घेतलेला नाही आणि आता प्रवेश घ्यायचा आहे, अशा विद्यार्थ्यांनी १५ ऑक्टोबर ते १७ ऑक्टोबर सकाळी साडेदहा ते एक या वेळेत स्वत:ची कागदपत्रे घेऊन उपस्थित रहावे. तिथून त्यांची प्रवेशप्रक्रिया राबवली जाईल. यानंतर कोणत्याही प्रकारची प्रवेशफेरी होणार नाही, असे अकरावी केंद्रीय ऑनलाइन प्रवेशप्रक्रियेचे अध्यक्ष प्रवीण अहिरे यांनी स्पष्ट केले.