मुलांमधील लठ्ठपणा टाळण्यासाठी...

व्यायामाची जोड
योगासनांमुळे मुले निरोगी व उत्साही होतात. यासाठी तुमच्या मुलांना योगासनांचा सराव करण्यास शिकवा. पूर्वी निरोगी आयुष्यासाठी विद्यार्थांना सूर्यनमस्कार व प्राणायाम शिकविले जात असत.
एरोबिक्स
व्यायाम, सायकलिंग, नृत्य हे देखील प्रभावी व्यायाम प्रकार आहेत. जे केल्यामुळे कॅलरिज कमी होतात आणि वजन कमी होते.
खेळण्यासाठी प्रोत्साहन
मुलांसाठी खेळ हा देखील एक उत्तम व्यायाम असू शकतो. यासाठी मुलांना त्यांच्या आवडत्या खेळाच्या स्पर्धांमध्ये भाग घेण्यासाठी प्रोत्साहन द्या.
जीवनशैलीत बदल करा
एका संशोधनात मुले टीव्ही, मोबाइल, कम्प्युटर, प्ले-स्टेशन यामध्ये जास्त रमत असल्याचे स्पष्ट झाले आहे. या सवयींमुळे मुलांमधील लठ्ठपणा अधिकच वाढतो. यासाठी पालकांनी मुलांच्या गॅजेट्स वापरावर व जंक फूड खाण्यावर निर्बंध घालावेत.
आहार कसा असावा?
नीरज मेहता यांच्या मते पौष्टिक पदार्थांची चव मुलांना आवडत नसल्याने मुले ते पदार्थ खाण्यासाठी टाळाटाळ करतात, ही एक खूप मोठी समस्या आहे. पण चांगले पौष्टिक पदार्थ मुलांना खायला लावणे हे पालकांचे प्रमुख कर्तव्य आहे.
आहाराच्या अचूक सवयी
ताजे अन्न खा
मुलांच्या आहारात ताज्या भाज्या आणि फळांचा समावेश करा.
पालेभाज्यांचा समावेश
हिरव्या पालेभाज्यांमध्ये लोह, फायबर व कॅलशियम भरपूर प्रमाणात असते. ज्यामुळे मेटाबॉलिजम सुधारेल आणि शरीराला पूरेशी ऊर्जा मिळेल. तसेच पालेभाज्यामुळे मुलांची स्मरणशक्तीही वाढते.
भरपूर फळे खा
जीनसत्व ए, सी आणि ईयुक्त फळांमुळे मुलांची स्मरणशक्ती वाढते व मेटाबॉलिजम सुधारते. मुलांना मधल्या वेळेत फळे दिल्याने मुलांचे पोट भरेल त्यामुळे ते वजन वाढवणारे इतर पदार्थ खाणार नाहीत.
पौष्टिक आहार
गहू, ओट्स, वाटाणे, सोयाबिनसारख्या पौष्टिक धान्यांमुळे मेंदू कार्यक्षम होतो व शरीराला पुरेशी ऊर्जा मिळते. या पदार्थामुळे मुलांची भूक भागल्याने मुले बाहेरचे पदार्थ कमी खातात.
सुकामेवा
अक्रोड, बदामामध्ये ओमेगा-३ व झिंकसारखी पोषणमूल्ये असतात. ज्यामुळे मेंदूला योग्य चालना मिळते. पोषक कॅलरीजसोबत ड्रायफ्रूट्समध्ये त्वरीत ऊर्जा देण्याची देखील क्षमता असते.
भरपूर पाणी प्या
आपल्या शरीराला भरपूर पाण्याची आवशक्ता असते. त्यामुळे पचनशक्ती सुधारते. रोज सकाळी रिकाम्या पोटी पाणी प्यायल्याने मेटाबॉलिजम ३० टक्क्यांनी सुधारते. त्याचप्रमाणे लिंबू पाणी, नारळ पाणी, ताज्या फळांचा रस यांचा देखील मुलांच्या आहारात समावेश करा. मात्र मुलांना कधीही शीतपेये देऊ नका.
विशिष्ट अंतराने आहार घ्या
दिवसभरात दर २ ते ३ तासांनी मुलांना थोडा-थोडा पोषक आहार घेण्याची सवय लावा. यामुळे त्यांचे मेटाबॉलिजम सुधारेल व ती अधिक उत्साही राहतील.