Free education for girl in Maharashtra: महाराष्ट्रात विद्यार्थिनींना शुल्क मागणाऱ्या कॉलेजांवर तक्रार नोंदविण्यासाठी हेल्पलाइन क्रमांक, वेबसाइटची लिंक प्रसिद्ध helpdesk.maharashtracet.org
राज्यातील कॉलेजांना इंजिनीअरिंग, मॅनेजमेंट, हॉटेल मॅनेजमेंट, फार्मसी अशा व्यावसायिक अभ्यासक्रमांना मुलींना प्रवेश देताना, शैक्षणिक शुल्कात १०० टक्के सवलत द्यावी लागणार आहे. विद्यार्थिनींना शुल्क भरण्याची सक्ती करणाऱ्या कॉलेजांना विभागीय सहसंचालकांनी प्रत्यक्ष भेट देऊन, त्या कॉलेज प्रशासनाला समज द्यावी. त्याचप्रमाणे कॉलेजवर कारवाई करण्याची प्रक्रिया करावी. कॉलेजांवर केलेल्या कारवाईचा अहवाल डीटीईकडे पाठविण्यात यावा, असा आदेश डॉ. मोहितकर यांनी राज्यातील सहसंचालकांना दिला आहे.
राज्य सरकारने चालू शैक्षणिक वर्षापासून ६४२ अभ्यासक्रमांमध्ये विद्यार्थिनींना पदवी आणि पदव्युत्तर अभ्यासक्रमांना १०० टक्के शुल्क सवलत (मोफत शिक्षण) देण्याचा निर्णय घेतला आहे. त्यानुसार विद्यार्थिनींना कॉलेजांमध्ये शैक्षणिक शुल्क न भरता प्रवेश मिळणार आहे. मात्र, राज्यातील मुलींना व्यावसायिक; तसेच बिगरव्यावसायिक पदवी आणि पदव्युत्तर अभ्यासक्रमांना प्रवेश घेताना १०० टक्के शुल्क सवलत मिळत नाही. कॉलेजांकडून शुल्काची मागणी होत असल्याचे वृत्त माध्यमातून प्रसिद्ध करण्यात आले होते. या वृत्ताची दखल 'डीटीई'ने घेतली असून, मुलींना शुल्क भरण्याची सक्ती करणाऱ्या कॉलेजांवर कारवाई करण्यात येणार असल्याचे सोमवारी जाहीर केले. त्यामुळे उच्च शिक्षणासाठी इच्छुक असणाऱ्या हजारो विद्यार्थिनींना दिलासा मिळणार आहे.
व्यावसायिक अभ्यासक्रमांना प्रवेश घेणाऱ्या विद्यार्थिनींना शैक्षणिक शुल्क भरण्याची सक्ती करणाऱ्या शैक्षणिक संस्थांवर कारवाई करून त्याचा अहवाल पाठवावा, असा आदेश तंत्रशिक्षण संचालक (डीटीई) डॉ. विनोद मोहितकर यांनी विभागीय सहसंचालकांना सोमवारी दिला. शुल्कासाठी तगादा लावणाऱ्या कॉलेजांची तक्रार करण्यासाठी हेल्पलाइन क्रमांक आणि वेबसाइटची लिंक विभागाने प्रसिद्ध केली असून, त्यावर विद्यार्थिनींनी तक्रार करावी, असे आवाहनही संचालनालयाने केले आहे.
हेल्पलाइन क्रमांक आणि ऑनलाइन तक्रार प्रणाली
कॉलेजांची तक्रार करण्यासाठी हेल्पलाइन क्रमांक - ७९६९१३४४४०, ७९६९१३४४४१
ऑनलाइन तक्रारीसाठी वेब प्रणाली लिंक -
helpdesk.maharashtracet.org या लिंकचा वापर करून ऑनलाइन तक्रार नोंदविता येईल. तक्रार नोंदविल्यानंतर विद्यार्थिनींना त्याचा क्रमांकही मिळेल. या क्रमांकाद्वारे तक्रारीचा मागोवा घेता येईल. शुल्कासाठी अडवणूक झाल्यास कॉलेजांच्या तक्रारी कराव्यात, असे 'डीटीई'कडून सांगण्यात आले आहे.
0 Comments