मतदानासाठी दिलेल्या विशेष सुट्टीसाठी मागितले रजेचे अर्ज

म. टा. विशेष प्रतिनिधी, मुंबई
मुंबई पदवीधर व शिक्षक मतदार संघाच्या निवडणुकीत शिक्षकांना मतदान करता यावे यासाठी शाळांना २५ जून रोजी विशेष सुट्टी देण्यात आली होती. मात्र त्यानंतर दुसऱ्या दिवशी शिक्षकांकडे रजेचा अर्ज मागितल्याची तक्रारी शिक्षक करत आहेत. मात्र या दिवसासाठी रजा कापण्यात येऊ नये, अशी मागणी शिक्षक परिषदेने शिक्षण उपसंचालकांकडे केली आहे
जिल्हाधिकारी व जिल्हा निवडणूक अधिकाऱ्यांच्या पत्रानुसार मुंबई विभागीय शिक्षण उपसंचालकांनी मुंबईतील उत्तर, पश्चिम व दक्षिण विभागातील सर्व शाळांतील शिक्षकांना मुंबई पदवीधर व शिक्षक मतदार संघाच्या निवडणुकीत मतदानाचा हक्क बजावता यावा म्हणून २५ जून रोजी विशेष सुट्टी जाहीर केली. त्यामुळे शिक्षक मोठ्या संख्येने मतदान करू शकले. मात्र मुंबईत दुसऱ्या दिवशी शाळा प्रशासनाने शिक्षकांना 'किरकोळ रजे'चा अर्ज मागितल्याच्या काही तक्रारी आल्या आहेत. त्याची दखल घेत शिक्षक परिषदेचे सदस्य अनिल बोरनारे यांनी बुधवारी शिक्षण उपसंचालकांकडे शाळांनी रजेच्या अर्जाची मागणी करू नये. तसेच त्याविषयी शाळांना पत्र देऊन संभ्रम दूर करावा, अशी मागणी केली.