विद्यार्थी आत्महत्येप्रकरणी प्राचार्य, शिक्षकांना दिलासा

म. टा. प्रतिनिधी, पुणे
शिक्षकांनी शिक्षा केल्यामुळे शुभम सुरवाडे या दहावीतील विद्यार्थ्याने खाणीतील पाण्यात उडी मारून आत्महत्या केल्याप्रकरणी देहूरोड येथील केंद्रीय विद्यालयाच्या प्राचार्य आणि शिक्षकांना मुंबई हायकोर्टाने दिलासा दिला आहे. प्राचार्य आणि शिक्षकांवर पोलिसांनी दंडात्मक कारवाई न करण्याचे आदेश हायकोर्टाने दिला आहे.
शुभम केंद्रीय विद्यालयात दहावीत शिकत होता. तीन जुलै २०१८ला त्याने आत्महत्या केली. शाळेच्या वहीत आत्महत्येला शाळेतील शिक्षक जबाबदार असल्याचे त्याने लिहिले होते. या प्रकरणी देहूरोड पोसिस स्टेशनमध्ये प्राचार्य आणि इतर शिक्षकांविरुद्ध गुन्हा दाखल करण्यात आला. प्राचार्य आणि शिक्षकांनी हा गुन्हा निकाली काढण्यासाठी अॅड. अनिकेत निकम यांच्या मार्फत हायकोर्टात याचिका दाखल केली. याचिकेवर न्यायमूर्ती रणजित मोरे, न्यायमूर्ती अनंत बदर यांच्या खंडपीठापुढे सुनावणी झाली.
मुलाच्या आत्महत्येला शिक्षकांना जबाबदार धरता येणार नाही. त्याला गैरवर्तणुकीमुळे चार दिवसांसाठी शाळेतून निलंबित करण्यात आले होते. अशा परिस्थितीत एखादी विद्यार्थी जेव्हा आत्महत्या करतो, तेव्हा त्यासाठी शाळेच्या शिक्षकांना जबाबदार धरणे चुकीचे होईल. अशा स्वरूपाचे गुन्हे दाखल व्हायला लागले तर, शिक्षकांचे मनोबल खचून जाईल असा युक्तिवाद अॅड. निकम यांनी केला. त्यांचा युक्तिवाद मान्य करून खंडपीठाने प्राचार्य आणि अन्य शिक्षकांवर दंडात्मक कारवाई न करण्याचे पोलिसांना बजावले.