अर्थपूर्ण व्यवहारप्रकरणी शिक्षणाधिकारी अटकेत

धुळे जिल्ह्यातील प्रकार; पोलिसांची कारवाई
म. टा. वृत्तसेवा, धुळे
जिल्ह्यातील विविध ठिकाणच्या शैक्षणिक संस्थांमध्ये कायम आरक्षित जागांवर खुला व इतर मागासवर्गीय संवर्गातील शिक्षकांच्या नियुक्तीत अर्थपूर्ण व्यवहारावरून तत्कानील शिक्षणाधिकारी भगवान सूर्यवंशी यांना अटक करण्यात आली.
सन २००७ ते २०१० या कालावधीत धुळे जिल्ह्यातील अनेक शिक्षण संस्थांमध्ये २ कोटी ७२ लाख ८ हजार ५०४ रुपयांचा अर्थपूर्ण व्यवहार करून शासनाच्या कार्यपद्धतीचा गैरवापर केल्याने तत्कालीन चार शिक्षणाधिकाऱ्यांवर गुन्हा दाखल करण्यात आला होता. या प्रकरणी दोन शिक्षणाधिकाऱ्यांना अटक करण्यात आली होती. उर्वरित दोनपैकी गेल्यावर्षी सेवानिवृत्त झालेले नाशिक येथील शिक्षण उपसंचालक भगवान सूर्यवंशी यांना शहर पोलिसांनी शुक्रवारी रात्री अटक केली. धुळे माध्यमिक शिक्षणाधिकारी कार्यालयातील उपशिक्षणाधिकारी किशोर अभिमन पाटील यांनी २४ फेब्रुवारी २०१७ रोजी शहर पोलिस ठाण्यात फिर्याद दिली होती. त्यामध्ये धुळे जिल्ह्यातील बेटावद, कापडणे, शिंदखेडा यांसह विविध ठिकाणच्या शैक्षणिक संस्थांमध्ये मागासवर्गीयांचा कायम आरक्षित जागी खुला व इतर मागासवर्गीय शिक्षकांना नियुक्त्या देऊन २ कोटी ७२ लाख ८ हजार ५०४ रुपयांचा अर्थपूर्ण व्यवहार केला, असे नमूद करण्यात आले होते. या प्रकरणी भगवान सदाशिव सूर्यवंशी, तत्कालीन शिक्षणाधिकारी तथा तत्कालीन शिक्षण उपसंचालक नाशिक (रा. चेतनानगर, नाशिक), घन:शाम नरसई पाटील (रा. ब्रम्हसृष्टी कॉलनी, जुने मोहिदा रोड, शहादा जि. नंदुरबार), जी. के. पाडवी (रा. धुळे) आणि चंद्रभान सांडू परचुरे (रा. सावली समृद्धी कॉलनी, दिंडोरी रोड, नाशिक) या शिक्षणाधिकाऱ्यांनी अर्थपूर्ण व्यवहार केला होता. यात घन:शाम पाटील व चंद्रभान परचुरे यांना पोलिसांनी अटक केली असून, जी. के. पाडवी यांचा शोध घेण्यात येत आहे.