वापरा आरोग्यदायी apps ... बना स्वतःचे डॉक्टर!

'आरोग्यम् धनसंपदा' हे वाक्य नेहमीच आपल्या बोलण्यात येत असतं. पण ते प्रत्यक्ष आचरणात आणणं हे इतकं सोपं नसतं. दररोजच्या धावत्या जगात आरोग्यासाठी आपल्याकडे पुरेसा वेळ नसतो. पण काळजी करण्याची गरज नाही, कारण आम्ही घेऊन आलो आहोत असे काही स्मार्टफोन अॅप्स जे तुम्हाला तुमचं आरोग्य जपण्यासाठी मदत करेल. चला तर मग जाणून घेऊ फिटनेस अॅप्सविषयी...
००००
तेजल निकाळजे, साठ्ये कॉलेज
ड्रिंक वॉटर रिमाइंडर
अॅपचं नाव वाचून तुम्हाला साधारण कल्पना आलीच असेल. त्यानुसार उत्तम आरोग्यासाठी सतत पाणी पिणं गरजेचं असतं. 'ड्रिंक वॉटर रिमाइंडर' हे अॅप आपल्याला पाणी पिण्यासाठी केवळ आठवण करून देत नाही तर तुमच्या शरीरातील पाण्याची पातळी किती आहे ते सांगते. तसंच तुम्ही तुमच्या सोयीनुसार स्नूझही करू शकता. आपल्याला आजकाल प्रत्येक गोष्टीत रिमाइंडर लागतो. त्यामुळे तुमची ही गरज या अॅपमुळे नक्की पूर्ण होईल.
हेडस्पेस
आनंदी जीवनासाठी आपल्याला शारीरिक सुदृढते सोबतच मानसिक आरोग्याकडे तेवढंच लक्ष देण्याची गरज असते. पण प्रत्येकालाच ते जमेल असं नाही, त्यामुळे आपल्या मानसिक आरोग्याची काळजी घेण्यासाठी हेडस्पेस नावाचं अॅप आपली मदत करू शकतं. अॅपमध्ये प्रवेश केल्यावर आपल्यासमोर काही ऑप्शन येतात ज्याद्वारे आपल्याला ध्यानधारणेबद्दल कितपत माहिती आहे हे त्यांना समजतं. त्यानुसार ते आपल्याला सेशन्स देतात. या अॅपद्वारे आपलं समुपदेशनही केलं जातं. त्यामुळे तुमचं घरबसल्या मेडीटेशन होतं.
कॅलरिज इन फूड
आपल्या आवडत्या पदार्थात किती प्रथिनं, कर्बोदकं किंवा फॅट्स आहेत हे आपल्याला जाणून घ्यायला नेहमीच आवडतं. आजकालच्या जंक फूडच्या जमान्यात काही मंडळी अगदी परफेक्ट डाएट करतात. यासाठी तुम्हाला आहारतज्ज्ञाची मदत घ्यावी लागते. पण कॅलरीज इन फूड या अॅपमुळे तुम्ही खात असलेल्या पदार्थांमध्ये किती कॅलरीज आहेत हे तुम्हाला एका क्लिकमुळे कळू शकतील.
हर्बल हेल्थ केअर
अनेक प्रकारच्या रोगांचं औषध आजीबाईच्या बटव्यात असतं. पण आजकाल याचं प्रमाणही दुर्मिळ झालं आहे. त्यामुळे आजी बाईच्या बटव्यातील या गोष्टींची माहिती हर्बल हेल्थ केअर या अॅपमध्ये पाहायला मिळते. या अॅपमध्ये अनेक घरगुती उपचार सांगण्यात आले आहेत. त्यामुळे हे अॅप घरगुती वैद्याचं काम करतो.
हेल्थ केअर मेडिकल डिक्शनरी
वैद्यकीय क्षेत्राशी निगडित असणाऱ्यांसाठी गुगल प्ले हेल्थ केअर मेडिकल डिक्शनरीसारखे अॅप उपलब्ध आहेत. ज्यात युजर्सना तब्बल १६,००० वैद्यकीय क्षेत्राशी निगडित संज्ञा, आजार, औषधं, आवश्यक शब्दांचे अचूक अर्थ आणि माहिती यात दिली आहे. ही माहिती वैद्यकीय तज्ज्ञांच्या मदतीनं तयार करण्यात आली आहे. आपल्याला गरजेनुसार अक्षरांचा आकार कमी जास्त करता येत असल्यामुळे हे अॅप अनेक पद्धतीनं फायदेशीर ठरतंय.
हेल्थ डाएट फूड फिटनेस
प्रत्येक बारीकसारीक गोष्टीसाठी आहारतज्ज्ञांची मदत घेणं शक्य नसत. त्यामुळे अशा फिटनेस फ्रिक मंडळींसाठी हेल्थ डाएट फूड फिटनेस हे अॅप आहे. त्याशिवाय मधुमेह, उच्च रक्तदाब किंवा यासारख्या इतर समस्या असणाऱ्या मंडळींनी काय खावं? आणि काय खाऊ नये? याची माहितीही हे अॅप देतं.
टोटल हेल्थ केअर
आरोग्यासंबंधित संपूर्ण माहिती या एका अॅपमध्ये समाविष्ट करण्यात आली आहे. यात योग टिप्स, आहारात बदल कसा करावा? अशा सामान्य गोष्टींची माहिती लगेच मिळते.
एकूणच, अशा अॅप्समुळे तुम्हाला तुमचं आरोग्य जपण्यासाठी मदत होईल, हे नक्की!