नेटची परीक्षेची ‘अॅन्सर की’ जाहीर

म.टा. प्रतिनिधी, नागपूर
नॅशनल टेस्टिंग एजन्सीच्यावतीने घेण्यात आलेल्या नेट परीक्षेची 'अॅन्सर की' जाहीर करण्यात आली आहे. नेट परीक्षेला बसलेल्या सर्व विद्यार्थ्यांना ntanet.nic.in या संकेतस्थळावर ही 'अॅन्सर की' देण्यात आली आहे. २० ते २६ जून दरम्यान ही ऑनलाइन परीक्षा घेण्यात आली होती. देशभरातून ६ लाख ८१ हजार ७१८ विद्यार्थी या परीक्षेला बसले होते.
एनटीएच्या अधिकृत संकेतस्थळावर दिलेल्या लिंकवर क्लिक करून विद्यार्थ्यांना प्रश्नपत्रिका आणि त्यांनी दिलेली उत्तरे बघायला मिळणार आहेत, असे एनटीएने दिलेल्या सूचनेत म्हटले आहे. अधिकृत संकेतस्थळावरून विद्यार्थ्यांना आपले आक्षेपही नोंदविता येणार आहेत. आपले आक्षेप नोंदविण्यासाठी प्रत्येक प्रश्नासाठी विद्यार्थ्यांना एक हजार रुपये भरावे लागणार आहेत. आक्षेप बरोबर ठरल्यास विद्यार्थ्यांना पैसे परत मिळणार आहेत. ३ जुलैला सायंकाळी ५ पर्यंत विद्यार्थ्यांना आपले आक्षेप नोंदविता येतील. विद्यार्थ्यांनी आपल्या प्रश्नपत्रिका उत्तरे सेव्ह करून ठेवावीत, असेहीने एनटीने कळविले आहे. परीक्षेचा निकाल १५ जुलै रोजी जाहीर केला जाईल. या परीक्षेत पुनर्मूल्यांकन किंवा पुनर्तपासणी केली जाणार नाही. सहायक प्राध्यापक आणि ज्युनियर रिसर्च फेलोशिपकरिता ही परीक्षा घेण्यात येते. या आधी केंद्रीय माध्यमिक शिक्षण मंडळाच्या वतीने ही परीक्षा घेण्यात येत असे. डिसेंबर, २०१८ पासून एनटीएच्या वतीने या परीक्षेचे आयोजन करण्यात येते. एकूण ८१ विषयांमध्ये ही परीक्षा घेण्यात आली. परीक्षेकरिता २३७ शहरांमध्ये ६१५ केंद्रे प्रस्थापित करण्यात आली होती. परीक्षेतील गैरप्रकार रोखण्यासाठी सर्व केंद्रांवर सीसीटीव्ही सुरक्षा लावण्यात आली होती. याशिवाय परीक्षा केंद्रांवर जॅमर्सही लावण्यात आले होते. परीक्षेआधी ४ हजार सराव केंद्रे स्थापन करण्यात आली होती आणि सुमारे १० लाख विद्यार्थ्यांनी त्याचा लाभ घेतला, असे एनटीएने म्हटले आहे.