*आरटीई’ प्रवेशांना मुदतवाढ; अल्प प्रतिसादामुळे निर्णय...*
शिक्षण हक्क कायद्यांर्गत (आरटीई) राबवण्यात येणाऱ्या प्रवेश प्रक्रियेच्या प्रतीक्षायादीतील प्रवेशाला अल्प प्रतिसाद मिळत आहे. त्यामुळे प्रतीक्षायादीतील अधिकाधिक विद्यार्थ्यांनी प्रवेश घ्यावेत, यासाठी आरटीई प्रवेशाला २३ ऑक्टोबरपर्यंत मुदतवाढ देण्याचा निर्णय शिक्षण विभागाकडून घेण्यात आला आहे.
बालकांचा मोफत व सक्तीच्या शिक्षणाचा अधिकार अधिनियम २००९नुसार प्राथमिक शिक्षण संचालनालयाद्वारे खासगी शाळांमधील २५ टक्के जागांवर आरटीई प्रवेश प्रक्रिया राबवण्यात येते. #adityadhas सोडतीमध्ये राज्यभरातून पहिल्या फेरीमध्ये निवड झालेल्या १ लाख ९२६ विद्यार्थ्यांपैकी ६८ हजार २८३ विद्यार्थ्यांनी प्रवेश घेतले होते. तर मुंबईतून ५३७१ विद्यार्थ्यांपैकी ३१३२ विद्यार्थ्यांनी प्रवेश घेतले होते. यंदा प्रथमच जाहीर केलेल्या प्रतीक्षायादीतील प्रवेश प्रक्रिया ३० सप्टेंबर ते ८ ऑक्टोबरदरम्यान चालणार होती. मात्र प्रतीक्षायादीतील विद्यार्थ्यांच्या पालकांचा प्रवेश घेण्यासाठी फारच अल्प प्रतिसाद मिळाला. नऊ दिवसांमध्ये प्रतीक्षायादीत राज्यातून फक्त २३१९ विद्यार्थ्यांनी प्रवेश घेतले तर मुंबईतून फक्त ९२ विद्यार्थ्यांनी प्रवेश घेतले.
पालकांना आवाहन
शाळांमध्ये शिल्लक राहिलेल्या रिक्त जागांनुसार पालकांना मेसेजद्वारे प्रवेशाचा दिनांक कळवण्यात येत आहे. परंतु पालकांनी फक्त मेसेजवर अवलंबून न राहता आरटीई पोर्टलवर प्रवेशाची तारीख, अर्ज क्रमांक, प्रवेश घेण्याचा दिनांक पाहावा, अशा सूचनाही शिक्षण विभागाकडून दिल्या आहेत. तसेच शाळेत प्रवेश घेण्यासाठी बालकांना सोबत घेऊन जाऊ नये, असेही आवाहन करण्यात आले आहे.
0 Comments