अल्पसंख्याक शाळांतही समायोजन होणार

मुंबई: मुंबईसह राज्यात केलेल्या संचमान्यतेनुसार २ हजार ७०३ शिक्षक अतिरिक्त ठरले आहेत. हे शिक्षक अतिरिक्त ठरून अनेक वर्षे उलटले तरी सर्वांचा समायोजनाचा मार्ग अद्याप मोकळा झाला नव्हता. यातच आता अल्पसंख्याक शाळांमध्येही अतिरिक्त
शिक्षकांचे समायोजन होणार आहे. यामुळे अतिरिक्त शिक्षकांना मोठा दिलासा मिळणार आहे.
राज्यात करण्यात येणाऱ्या पटपडताळणीनंतर विद्यार्थी व शिक्षक गुणोत्तर तपासून कमी विद्यार्थी व जास्त शिक्षक असलेल्या शाळांमधील शिक्षक अतिरिक्त ठरविण्यात येतात. आता ग्रामविकास विभागाने शुक्रवारी एक परिपत्रक काढून शालेय शिक्षण विभागाने ज्या जिल्हा परिषद शाळांमध्ये नियुक्तीची यादी दिली आहे त्यानुसार कार्यवाही करण्याबाबत सूचना दिली आहे. यातच आता प्राथमिक शिक्षण संचालनालयाने या शिक्षकांचे समायोजन करताना अल्पसंख्याक शाळांतील रिक्त पदांचाही विचार करावा असे परिपत्रक काढले आहे. यामुळे आता जास्तीत जास्त अतिरिक्त शिक्षक समावून घेतले जाऊ शकतील अशी अशा व्यक्त होत आहे.