अंगणवाडी कर्मचाऱ्यांच्या हाती येणार स्मार्टफोन

म. टा. खास प्रतिनिधी, नाशिक
अंगणवाडीमधील कामकाज १ मेपासून पेपरलेस होणार असून येथे आता रजिस्टरऐवजी मोबाइल अॅपच्या वापर केला जाणार आहे. यासाठी या कर्मचाऱ्यांना स्मार्ट फोनही दिले जाणार आहे. त्यामध्येच लसीकरण व गृहभेटीच्या दैनंदिन नोंदी व बालकांच्या दैनंदिन नोंदी घेतल्या जाणार आहेत. त्यामुळे रजिस्टरवरील दैनंदिन नोंदीचे काम संपुष्टात येणार आहे.
एकात्मिक बाल विकास सेवा योजना आयुक्तालयाने विकसित केलेल्या मोबाइल ॲपचा त्यासाठी वापर केला जाणार आहे. त्यासाठी जिल्ह्यात सर्व स्तरावर प्रशिक्षण देण्यात येणार आहे. जिल्ह्यातील अंगणवाडी कर्मचाऱ्यांचे काम स्मार्ट होणार आहे. या स्मार्ट फोनमधून सर्व माहिती आणि दैनंदिन अहवाल ऑनलइन भरता येणार आहे.
जिल्हा परिषदेच्या सभागृहात बालविकास प्रकल्प अधिकारी, पर्यवेक्षिका यांनी बुधवारी कार्यशाळा घेतली. यात कुटुंबांची सर्व माहिती अद्यावत करून मोबाइल ॲपबाबत सविस्तर मार्गदर्शन करण्यात आले. जिल्हाभरात मोबाइल अॅपचा प्रभावीपणे वापर करून जबाबदारीने काम करण्याचे निर्देश जिल्हा परिषदेचे मुख्य कार्यकारी अधिकारी डॉ. नरेश गिते यांनी यावेळी दिले. येत्या आठवडाभरात सर्व मोबाइल फोन अंगणवाडी सेविकांना उपलब्ध होणार असून त्यानंतर पुन्हा २ एप्रिल ते ११ एप्रिल या काळात सरकारकडून याबाबत प्रशिक्षण देण्यात येणार असल्याची माहिती महिला व बालविकास विभागाचे उपमुख्य कार्यकारी अधिकारी दत्तात्रय मुंडे यांनी दिली. कार्यशाळेत जिल्ह्यातील सर्व बालविकास प्रकल्प अधिकारी, मुख्यसेविका, पर्यवेक्षिका आदी उपस्थित होते.
कोणते काम करणे शक्य?
अंगणवाडीत पूरक पोषण आहार, औषधी वाटप, बालकांचे वेळोवेळी वजन घेणे गरोदर माता, बालकांचे वजन, लसिकरण यासह इतर बाबींची कामे असतात. या सर्व कामांचा अहवाल अंगणवाडी सेविकांना केंद्र किंवा तालुकास्तरावर द्यावा लागत असतो. तो आता स्मार्ट फोनद्वारे देता येणे शक्य होणार आहे.
वेळेची बचत
दुर्गम भागात रस्त्यांची व वाहनांची कमतरता लक्षात घेता असे अहवाल वेळेत सादर करण्याची मोठी कसरत अंगणवाडी कर्मचाऱ्यांना करावी लागते. मात्र, आता या स्मार्ट फोन आणि मोबाइल अॅपमुळे वेळेत बचत होणार असून सदरची माहिती तालुकास्तरापासून ते राज्यस्तरापर्यंत बघता येणार आहे.