अंगणवाड्यांचे काम जूनपासून पेपरेलस

अंगणवाडी कर्मचाऱ्यांना मोबाइल फोन; कामकाजास सुरुवात
म. टा. प्रतिनिधी, नगर
राज्य सरकारने राज्यातील अंगणवाडी कर्मचाऱ्यांना मोबाइल देण्याचा निर्णय घेतला आहे. नगर जिल्ह्यात या निर्णयाची अंमलबजावणीस सुरुवात करण्यात आली आहे. जिल्ह्यातील ५ हजार ७४७ अंगणवाडी कर्मचाऱ्यांना मोबाइल दिले आहेत. अंगणवाड्यांतील दैनंदिन कामकाज या मोबाइलद्वारे करण्यात येणार आहे. साधारण जून महिन्यापासून जिल्ह्यातील अंगणवाड्यात या पद्धतीने कामकाज सुरू होणार आहे.
या नव्या निर्णयानुसार कशा पद्धतीने कामकाज करायचे, याबाबत कर्मचाऱ्यांच्या कार्यशाळा घेण्यात येत आहेत. एकात्मिक बाल विकास सेवा योजना आयुक्तालयाने विकसित केलेल्या मोबाइल अॅपद्वार कामकाज करण्यात येणार आहे. नोंदवहीऐवजी आता मोबाइल अॅपच्या माध्यमातून या स्मार्ट फोनमध्येच बालकांचे लसीकरण तसेच अन्य प्रकारच्या नोंदी घेण्यात येणार आहे. त्यामुळे कागदपत्रांचा ताण कमी होणार आहे. अंगणवाडीतील पूरक पोषण आहार, औषधी वाटप, बालकांचे वेळोवेळी वजन घेणे, बालकांचे वजन, लसीकरण यासह इतर बाबींची कामे असतात. या सर्व कामांचा अहवाल अंगणवाडी कर्मचाऱ्यांना केंद्र किंवा तालुकास्तरावर द्यावा लागतो. दुर्गम भागात रस्त्यांची व वाहनांची कमतरता लक्षात घेता असे अहवाल वेळेत सादर करण्याचे आव्हान कर्मचाऱ्यांसमोर कायमच असते. आता मात्र मोबाइलद्वारेच कामकाज केले जाणार आहे. त्यामुळे वेळेचा अपव्यय थांबणार आहे. तसेच राज्यस्तरावरही अंगणवाडीतील कामकाजाची माहिती घेता येणार आहे.
--
वेळखाऊ कामांपासून सुटका
राज्य सरकारकडून अत्याधुनिक तंत्रज्ञानाचा वापर करण्यात येत आहे. सरकारी कार्यालयातील कामकाज अचूक आणि पारदर्शकपणे करण्यासाठी ऑनलाइनवर भर देण्यात आला आहे. कागदांवर नोंदी घेऊन फाइल तयार करणे, नोंदवह्यांवर नोंदी घेणे, अहवाल पाठवणे, अहवाल मागवणे या वेळखाऊ कामांची आवश्यकता आता राहणार नाही. अंगणवाड्यांतील दैनंदिन कामे आता मोबाइलद्वारे केली जाणार आहेत. मोबाइल अॅपमध्ये माहिती नियमितपणे अपडेट करावी लागणार आहे. त्यामुळे कोणत्या अंगणवाडीत किती बालके आहेत, त्यांना कोणता आहार दिला जातो, बालकांचे लसीकरण होत आहे का, बालकांचे वजन किती आहे या बाबींची माहिती तत्काळ उपलब्ध होणार आहे.