‘सेट’ परीक्षेत साडेपाच हजार (6.78%) जण उत्तीर्ण

म. टा. प्रतिनिधी, मुंबई
महाराष्ट्र आणि गोवा या राज्यांसाठी २३ जूनला झालेल्या सेट परीक्षेचा निकाल शुक्रवारी दुपारी २ वाजता जाहीर करण्यात आला. यात उत्तीर्ण झालेल्यांचे प्रमाण ६.७८ टक्के आहे. या परीक्षेला ७९ हजार ८७९ उमेदवार बसले होते. पैकी पाच हजार ४१५ उत्तीर्ण झाले आहेत.
यंदा ही परीक्षा पुण्यातील सावित्रीबाई फुले विद्यापीठातर्फे घेण्यात आली होती. सहाय्यक प्राध्यापक होण्यासाठी ती उत्तीर्ण होणे आवश्यक असते. उत्तीर्ण उमेदवारांनी निकाल जाहीर झाल्यापासून एक महिन्यात, आवश्यक असलेली स्व-साक्षांकित पात्रता प्रमाणपत्रे ऑनलाइन अर्जासह सादर करणे अपेक्षित आहे, अशी माहिती या सेट परीक्षेचे समन्वयक प्रा. बी. पी. कापडणीस यांनी दिली. उत्तीर्ण उमेदवारांना पदव्युत्तर अभ्यासक्रमाच्या शेवटच्या वर्षाची किंवा समकक्ष परीक्षेची गुणपत्रिका, नाव बदलले असल्यास लग्नाचे प्रमाणपत्र/ गॅझेटची प्रत, जात प्रमाणपत्र/ वैधता प्रमाणपत्र, आवश्यक प्रवर्गांसाठी नॉन-क्रिमीलेयर प्रमाणपत्र, दृष्टीशी संबंधित किंवा शारीरिकदृष्ट्या विशेष व्यक्तींसाठी वैद्यकीय प्रमाणपत्र, अनाथ किंवा ट्रान्सजेंडर गटात मोडणाऱ्या व्यक्तींसाठी आवश्यक प्रमाणपत्र सादर करायची आहेत. दरम्यान, यंदा परीक्षा पद्धतीतमध्ये करण्यात आलेल्या बदलामुळे निकाल घटल्याचे विद्यार्थ्यांचे मत आहे.