नवी दिल्ली:
जवाहरलाल नेहरू विद्यापीठ ( जेएनयू ) मधील फीवाढी विरोधातील विद्यार्थी आंदोलनाला यश आले आहे. विद्यापीठाने फीवाढ शिथील करण्याचा आदेश देत विद्यार्थ्यांना पुन्हा वर्गात परतण्याचे आवाहन केले. शिक्षण सचिव आर. सुब्रमण्यम यांनी बुधवारी ट्विट करत ही माहिती दिली. कार्यकारी समितीने होस्टेल शुल्कात वाढ आणि अन्य नियमांशी जोडलेल्या शुल्कात कपात केली आहे.
विद्यापीठाच्या कार्यकारी परिषदेच्या बैठकीत हा निर्णय घेण्यात आला. शिक्षण सचिवांनी सांगितले की कार्यकारी परिषदेच्या बैठकीत आर्थिकदृष्ट्या मागास विद्यार्थ्यांना अर्थसहाय्य उपलब्ध करण्यासंबंधी योजनेचा प्रस्तावही मांडण्यात आला.
विद्यार्थ्यांच्या आंदोलनामुळे विद्यापीठ प्रशासनाने कार्यकारी परिषदेची बैठक विद्यापीठ संकुलाच्या बाहेर बोलावली होती. ही परिषद जेएनयूची सर्वात मोठी नियामक संस्था आहे. जेएनयू टीचर्स असोसिएशनचा आरोप आहे की या परिषदेच्या बैठकीची जागा बदलण्यात आल्याची माहिती शिक्षकांना दिली गेली नाही. जेएनयूटीएचे अध्यक्ष डी. के. लोबियाल यांनी सांगितले की 'आमचे अनेक मुद्दे आहेत, होस्टेलच्या मॅन्युअल व्यतिरिक्त शिक्षकांच्या पदोन्नतीचादेखील मुद्दा होता. म्हणूनच आमचे मुद्देदेखील आम्हाला मांडायचे होते. गेल्या ३-४ वर्षांपासून विद्या परिषदेची बैठक एक तर टाळली जाते किंवा अन्य ठिकाणी घेतली जाते. आम्ही याचा निषेध करतो. कुलगुरुंनी अशा पद्धतीने विद्यापीठ चालवायला नको.'
जेएनयुत विद्यार्थ्यांचा शुल्कवाढीविरोधात उद्रेक
मागण्या काय?
'जेएनयू' विद्यापीठाच्या वसतिगृहातील शुल्कात भरमसाठ वाढ करण्यात आल्याचे विद्यार्थ्यांचे म्हणणे आहे. वसतिगृहात पहिल्यांदाच १,७०० रुपये सेवाशुल्क आकारण्याचा निर्णय घेण्यात आला आहे. तसेच खाणावळीचे परत मिळणारे डिपॉजिट साडेपाच हजारांवरून १२ हजार करण्यात आले आहे, तर एकट्यासाठीच्या खोलीचे शुल्क २०वरून ६०० रुपये व दोघांसाठीच्या खोलीचे शुल्क १० रुपयांवरून ३०० रुपये करण्यात आले आहे. आम्ही मागील काही दिवसांपासून या शुल्कवाढीचा विरोध करत आहोत, मात्र कुलगुरूंसह विद्यापीठ प्रशासन याकडे सपशेल दुर्लक्ष करत आहे. 'जेएनयू'मध्ये शिकणारे बहुतांश विद्यार्थी हे गरीब कुटुंबातील आहेत. एवढी सुमारे ३०० पट शुल्कवाढ झाल्यानंतर त्यांनी शिकायचे कसे, असा प्रश्न आंदोलक विद्यार्थ्यांनी उपस्थित केला.
0 Comments