पट पडताळणी 2025-26 | बोगस विद्यार्थी शोधणे, संचमान्यतेसाठी कडक निर्बंध

November 21, 2025

पट पडताळणी 2025-26 | बोगस विद्यार्थी शोधणे, संचमान्यतेसाठी कडक निर्बंध | राज्यातील शाळांची पटपडताळणी करण्याचे अनुषंगाने स्टुडंट पोर्टलवर HM Login, Cluster Head Login, BEO Login EO Login वर सुविधा उपलब्ध करुन दिली जाणार आहे.

राज्यातील शाळांची पॅट परीक्षेदरम्यान पट पडताळणी करणेबाबत परिपत्रक 06 एप्रिल 2026

राज्यातील शाळांची पटपडताळणी करण्याबाबत खालील प्रमाणे सूचना देण्यात येत आहेत.

इ. २ री ते इ.९ व इ. ११ वी या वर्गाची पटपडताळणी ११ एप्रिल २०२६, १५ एप्रिल २०२६ व २२ एप्रिल २०२६ रोजी करण्याचे निर्देश देण्यात आले आहेत.

इयत्ता १ ली बाबतची पटपडताळणी ही उपरोक्त तारखांच्या दिवशीच (११ एप्रिल २०२६, १५ एप्रिल २०२६ व २२ एप्रिल २०२६) करण्याचे नियोजन करावे.

सदर पटपडताळणी करण्याच्या अनुषंगाने शिक्षण विभागाव्यतिरिक्त जिल्हा परिषदेच्या इतर विभागातील अधिकारी / कर्मचारी यांची सेवा मा. मुख्य कार्यकारी अधिकारी, जिल्हा परिषद (सर्व) यांच्या माध्यमातून उपलब्ध करुन घ्यावी.

परिपत्रक 06 एप्रिल 2026

पॅट परीक्षेदरम्यान पट पडताळणी करणेबाबत परिपत्रक 30 मार्च 2026

राज्यातील शाळांची पटपडताळणी करण्याबाबत खालील प्रमाणे सूचना देण्यात येत आहेत.

१. इयत्ता १०वी व इयत्ता १२वी विद्यार्थ्यांची पटपडताळणी करण्याची आवश्यकता नाही. बोर्डाच्या परीक्षेमधील विद्यार्थी उपस्थिती ही ग्राह्य धरण्यात येईल.

२. शैक्षणिक सत्र २०२५-२६ मध्ये इयत्ता ११वी मधील विद्यार्थ्यांच्या वार्षिक परीक्षेतील मराठी, इंग्रजी आणि भौतिकशास्त्र या विषयांच्या परीक्षेच्या दिवशी पटपडताळणी करण्यात यावी.

३. इयत्ता २री ते इयत्ता ८वी च्या वर्गाच्या बाबतीत राज्य शैक्षणिक संशोधन व प्रशिक्षण परिषद, महाराष्ट्र, पुणे यांनी आयोजित केलेल्या नियतकालिक मूल्यांकन चाचणी (PAT) परीक्षेच्या दिनांकादिवशी म्हणजेच ११/०४/२०२६, १५/०४/२०२६,२२/०४/२०२६ रोजी करण्यात यावी,

४. इयत्ता ९वी या वर्गाच्या बाबतीत पटपडताळणी उपरोक्त तारखांच्या (११/०४/२०२६, १५/०४/२०२६, 2२/०४/२०२६) दिवशीच करणे नियोजित आहे.

५. राज्यातील सर्व शाळांमधील पटपडताळणी दिनांक ११/०४/२०२६. दिनांक १५/०४/२०२६ व दिनांक २२/०४/२०२६ या तीन दिवशी करण्याच्या अनुषंगाने इयत्ता ९ वी चे मराठी, गणित व इंग्रजी या विषयांची वार्षिक परीक्षा अनुक्रमे दि. ११ एप्रिल २०२६, १५ एप्रिल २०२६ व २२ एप्रिल २०२६ रोजी आयोजित करण्यात यावेत.

६. तसेच इयत्ता ११ वीच्या बाबतीत मराठी, भौतिकशास्त्र व इंग्रजी या विषयांची वार्षिक परीक्षासुध्दा अनुक्रमे दि.११ एप्रिल २०२६, १५ एप्रिल २०२६ व २२ एप्रिल २०२६ रोजी आयोजित करण्यात यावेत. जेणेकरुन राज्यातील सर्व शाळांमधील इयत्ता २री ते इयत्ता ९वी इयत्ता ११वी ची पटपडताळणी उपरोक्त तीन दिवशी पुर्ण होईल.

७. राज्यातील शाळांची पटपडताळणी करण्याचे अनुषंगाने स्टुडंट पोर्टलवर HM Login, Cluster Head Login, BEO Login EO Login वर सुविधा उपलब्ध करुन दिली जाणार आहे. पटपडताळणीच्या अनुषंगाने शाळेस भेट देणारे पथक उपरोक्त लॉगीनचा वापर करुन हजर व गैरहजर विद्यार्थ्यांची नोंद करतील. या सुविधेबाबत सविस्तर माहीती / सूचना आपणास ७ एप्रिल २०२६ रोजी किंवा तत्पूर्वी कळविण्यात येईल.

८. राज्यातील शाळांची पटपडताळणी करण्यासाठी पुरेसे मनुष्यबळ आवश्यक आहे, त्यासाठी क्षेत्रीय स्तरावरील केंद्र प्रमुख, गट शिक्षणाधिकारी, शिक्षणाधिकारी (प्राथ/माध्य, योजना), लेखाधिकारी, अधीक्षक (शालेय पोषण आहार), जिल्हा शिक्षण व प्रशिक्षण संस्था (DIET) चे अधिव्याख्याता वेतन व भविष्य निर्वाह निधी पथक चे अधीक्षक व विस्तार अधिकारी संवर्ग इ. यांची नेमणूक शाळेस भेट देणारे पथक म्हणून करावी व शाळेस प्रत्यक्ष भेट देवून पटपडताळणी करण्यासाठी नेमणूक करण्यात यावी.

९. शिक्षणाधिकारी (माध्य/ प्राथ) यांनी शाळा निहाय पटपडताळणीचे नियोजन आपल्या पातळीवरुन एकत्रितपणे करावे, अंमलबजावणी प्रभावीपणे होईल याकडे लक्ष द्यावे.

पॅट परीक्षेदरम्यान पट पडताळणी करणेबाबत संचालक परिपत्रक pdf - 30 मार्च 2026 - Click Here

New Update - पट पडताळणी बाबत परिपत्रक - 20 नोव्हेंबर 2025

संचमान्यता 2025-26 साठी माहिती अपडेट करणेबाबत परिपत्रक - Click Here

सन २०२५-२६ या शैक्षणिक वर्षापासून संच मान्यता यु-डायस प्लस प्रणाली मधील मुख्याध्यापकांनी नमूद माहितीच्या आधारे केली जाणार आहे. युडायस प्लस प्रणालीवर मुख्याध्यापक लॉगिन मधून विद्यार्थी माहिती भरण्यात आलेली आहे. सदर विद्यार्थ्यांची माहिती संच मान्यतेकरीता विचारात घेतली जाते. या माहितीचे प्रमाणिकरण व सत्यता पडताळणीची जबाबदारी ही केंद्रप्रमुख व गट शिक्षणाधिकारी यांची आहे.

संचमान्यता करिता विद्यार्थी पडताळणी संबंधी कार्यवाही करण्याचे निर्देश खलीलप्रमाणे

केंद्रप्रमुखांनी काळजीपूर्वक त्यांच्या कार्यक्षेत्रातील शाळेत शिक्षण घेत असलेल्या विद्यार्थ्यांची खातरजमा करणे आवश्यक आहे. यामध्ये अनियमितता झाल्यास तशी जबाबदारी केंद्रप्रमुख, विस्तार अधिकारी (बीट) व गटशिक्षणाधिकारी व मुख्याध्यापकांवर निश्चित करण्यात येईल.

मुख्याध्यापकांनी भरलेली माहिती केंद्रप्रमुख लॉगिनला फॉरवर्ड करण्यात आली आहे. यु-डायस प्लस कडील स्टुडंट पोर्टलवर प्राप्त झालेली माहिती केंद्रप्रमुख यांनी शाळेला प्रत्यक्ष भेट देऊन विद्यार्थी दैनिक उपस्थिती, भेटीच्या दिवशी हजर असलेले विद्यार्थी, परीक्षा दिनांकास उपस्थित असलेली विद्यार्थी तसेच यापूर्वी शाळेला भेट दिल्या असल्यास त्या दिवशीची दैनिक उपस्थिती या सर्वांचा विचार करुन केंद्रप्रमुखांनी त्यांच्या लॉगिनमधून बनावट विद्यार्थी किंवा सतत गैरहजर असणारे किंवा केवळ शिक्षक शिक्षकेतर पदे मंजूर होण्यासाठी जाणीवपूर्वक वाढविलेले पट इ. सारखे विद्यार्थी संचमान्यते करीता फॉरवर्ड होणार नाही. याची दक्षता घ्यावी.

प्रणालीवरील प्रवेशित विद्यार्थी पैकी काही विद्यार्थी चुकीच्या पद्धतीने समाविष्ट झाले असल्याचे निदर्शनास आल्यास असे विद्यार्थी केंद्रप्रमुखांनी कमी करून गटशिक्षणाधिकारी यांच्या लॉगिनला फेरफडताळणीसाठी वर्ग करावेत.

गटशिक्षणाधिकारी यांनी फेरफडताळणीसाठी वर्ग केलेल्या विद्यार्थ्यांची माहिती पुनश्चः पडताळणी करून व नमूदविद्यार्थी यांची माहिती योग्य असल्याची खात्री पटल्यास ती माहिती अंतिम करण्यात यावी. जो विद्यार्थी चुकीच्या पद्धतीने भरल्याचे निदर्शनास आले आहेत, असे विद्यार्थी कमी करावेत. सदरची पडताळणी दिनांक १५.१२.२०२५ पूर्वी अंतिम करणे आवश्यक आहे.

राज्यस्तरावरुन राज्यात एकाचवेळी सर्व शाळांमधील विद्यार्थ्यांची उपस्थिती विशेष पथकाद्वारे पडताळणी करण्यात येणार असल्याने सदर पडताळणीअंती अनियमितता किंवा चुकीच्या पद्धतीने विद्यार्थी प्रविष्ट झाल्याचे दिसून आल्यास ज्या पातळीवर अनियमितता आढळून आली असेल अशा सर्व संबंधितांवर जबाबदारी निश्चित करुन शिस्तभंगाची कारवाई प्रस्तावित करण्यात येईल, याची नोंद घ्यावी.