मराठा विद्यार्थ्यांना अकरावीत दिलासा

म. टा. विशेष प्रतिनिधी, मुंबई
मराठा समाजाला शिक्षणात १२ टक्के आरक्षण देण्यावर मुंबई उच्च न्यायालयाने शिक्कामोर्तब केल्यानंतर शिक्षण विभागाने अकरावीच्या प्रवेश वेळापत्रकात फेरबदल करण्याचा निर्णय घेतला आहे. त्यानुसार खुल्या वर्गातून प्रवेशअर्ज केलेल्या मराठा समाजाच्या विद्यार्थ्यांना आता प्रवर्ग बदलून आता एसईबीसी प्रवर्गातून अर्ज करण्याची मुभा दिली जाणार आहे. शालेय शिक्षणमंत्री आशीष शेलार यांनी याबाबतचे निवेदन शुक्रवारी विधानसभेत केले.
अकरावीत एसईबीसीच्या विद्यार्थ्यांसाठी १२ टक्क्यांप्रमाणे ३४,२५१ जागा राखीव ठेवण्यात आल्या आहेत. आत्तापर्यंत या प्रवर्गात केवळ ४ हजार ३५७ अर्ज आले आहेत. मराठा समाजातील विद्यार्थ्यांनी खुल्या वर्गात अर्ज केल्याचे शिक्षण विभागाच्या निदर्शनास आले आहे. त्यामुळे अशा विद्यार्थ्यांना प्रवर्ग बदलण्याची मुभा देण्यासाठी वेळापत्रकात बदल करण्याचा निर्णय घेण्यात आल्याचे शालेय शिक्षणमंत्र्यांनी जाहीर केले.
पालकांचे हमीपत्र पुरेसे
अनेक मराठा विद्यार्थ्यांकडे एसईबीसी प्रमाणपत्र नसल्याने त्यांनी खुल्या प्रवर्गात अर्ज केला असण्याचीही शक्यता आहे. या विद्यार्थ्यांची अडचण होऊ नये म्हणून या प्रवर्गात अर्ज करताना जातीच्या प्रमाणपत्राऐवजी पालकांचे हमीपत्र ग्राह्य धरले जाणार आहे. हे हमीपत्र प्रवेशाच्या वेबसाइटवर ऑनलाइन उपलब्ध आहे. या प्रवर्गात प्रवेश झाल्यानंतर जातीचे प्रमाणपत्र सादर करण्यासाठी तीन महिन्यांची मुदत देण्याचा निर्णयही घेण्यात आला आहे. याचा फायदा अकरावीत नामांकीत कॉलेजांत प्रवेश घेऊ इच्छिणाऱ्या मराठा समाजातील विद्यार्थ्यांना होणार आहे.
ईबीसींसाठीही संधी
केंद्र सरकारने आर्थिकदृष्ट्या दुर्बल घटकांसाठीही (ईबीसी) आरक्षण जाहीर केले आहे. त्यानुसार २८,६३४ जागा उपलब्ध असून, त्यामध्येही केवळ २६०० अर्ज आले आहेत. या घटकांतील विद्यार्थ्यांनीही खुल्या प्रवर्गात अर्ज केले असण्याची शक्यता असून, त्यांनाही ईबीसी प्रवर्गातून अर्ज करता यावेत यासाठी संधी उपलब्ध करून देण्यात आली आहे.