‘राफेल’चा आयटीआय कोर्स फुल्ल

बहुचर्चित राफेल लढाऊ विमानांच्या देखभाल-दुरुस्तीसाठी सुरू करण्यात आलेल्या 'आयटीआय'च्या अभ्यासक्रमाच्या केवळ २० जागांसाठी ५७१ विद्यार्थ्यांनी अर्ज केले असून, ९१ टक्के गुण असणाऱ्या विद्यार्थ्यांनी अभ्यासक्रमाला प्रवेश घेतला आहे. तर, प्रवेशाचा कटऑफ ८१ टक्के राहिला आहे. या अभ्यासक्रमाची प्रवेश प्रक्रिया पूर्ण झाली असून, प्रथमच फ्रान्सहून येणारे शिक्षक विद्यार्थ्यांना विमान देखभाल दुरुस्तीचे प्रशिक्षण देणार आहे. या प्रवेशासाठी दहावी उत्तीर्ण एकूण ५७१ विद्यार्थ्यांनी अर्ज केले होते. त्यापैकी २० जणांची निवड करण्यात आली आहे.
देशात प्रथमच नागपूर 'आयटीआय'मध्ये 'एअरोनॉटिकल स्ट्रक्चर अँड इक्विपमेंट फिटर' अभ्यासक्रमाची सुरुवात झाली आहे. या अभ्यासक्रमासाठी लागणाऱ्या पायाभूत सुविधा राफेलची निर्मिती करणाऱ्या फ्रान्सच्या 'दस्सू एव्हिएशन'तर्फे पुरविण्यात येणार आहेत. राफेल विमानाच्या सुट्या भागांचे डिझाइन करण्यापासून उत्पादनापर्यंत कुशल मनुष्यबळ उपलब्ध होण्याच्या उद्देशाने हा अभ्यासक्रम सुरू करण्यात आला आहे. सरकारी माहितीनुसार अभ्यासक्रमाच्या एकूण तीन तुकड्या सुरू करण्यात येणार असून, त्याची प्रवेशक्षमता १०५ आहे. मात्र, यंदा केवळ एकच तुकडी सुरू करण्यात आली असून, त्यामध्ये २० विद्यार्थ्यांना प्रवेश देण्यात आला आहे. या अभ्यासक्रमाची प्रवेश प्रक्रिया २५ आणि २६ सप्टेंबर रोजी पार पडली आहे. प्रवेशासाठी दहावी उत्तीर्ण एकूण ५७१ विद्यार्थ्यांनी अर्ज केले होते. त्यापैकी २० जणांची निवड करण्यात आली आहे. दहावीला ९१ टक्के गुण मिळालेल्या विद्यार्थ्याने पहिला प्रवेश घेतला असून, ८१ टक्के गुण मिळवलेल्या विद्यार्थ्याने अखेरचा प्रवेश घेतला आहे. यंदा ही प्रवेश प्रक्रिया उशीरा सुरू झाल्याने, प्रवेशाचे कटऑफ गुण ८१ टक्क्यांपर्यत आले. मात्र, पुढील प्रवेश प्रक्रियेत या अभ्यासक्रमाला प्रवेशासाठी लागणाऱ्या गुणांमध्ये वाढ होण्याची शक्यता आहे.
\B'विद्यार्थ्यांना कारखान्यात इंटर्नशीपची संधी मिळणार'\B
दस्सू कंपनी हवाई दलाची कार्यक्षमता वाढविण्यासाठी आवश्यक असणाऱ्या साहित्यांच्या डिझाइनपासून ते उत्पादनापर्यंत; तसेच देखभाल सेवा पुरविते. या अनुषंगाने देशात जागतिक प्रशिक्षण व शैक्षणिक उपक्रम विकसित करण्यासाठी सामंजस्य करारामार्फत दस्सू स्कील अॅकॅडमीची स्थापना झाली आहे. या अॅकॅडमीमार्फत उत्पादन, देखभाल या संबंधित आवश्यक असणाऱ्या कुशल मनुष्यबळाच्या निर्मितीसाठी प्रशिक्षण कार्यक्रम राबवित आहे. या अभ्यासक्रमासाठी दस्सू एव्हिएशनतर्फे यंत्रसामग्री व साधनसामग्री उपलब्ध होणार आहे. पहिल्या तीन वर्षांसाठी प्रशिक्षणासाठी आवश्यक असलेले कुशल मनुष्यबळ व कच्चा माल उपलब्ध होईल. नागपूरला राफेल विमानाच्या देखभाल-दुरुस्तीचा मोठा कारखाना उभारण्यात येत आहे. या विद्यार्थ्यांना कारखान्यात इंटर्नशीपची संधी मिळणार आहे आणि भविष्यात तेथेच चांगल्या नोकरीचीही संधी प्राप्त होणार आहे.
'एअरोनॉटिकल स्ट्रक्चर अँड इक्विपमेंट फिटर' अभ्यासक्रमाच्या प्रवेश प्रक्रियेला विद्यार्थ्यांनी उत्तम प्रतिसाद दिला आहे. या अभ्यासक्रमाच्या विद्यार्थ्यांना फान्सहून येणाऱ्या तीन शिक्षकांकडून मार्गदर्शन करण्यात येईल. विद्यार्थ्यांच्या सुविधेसाठी एक भारतीय शिक्षक असेल. या विद्यार्थ्यांना राफेलच्या देखभाल-दुरुस्ती कारखान्यात; तसेच इतर हवाई क्षेत्रात रोजगाराच्या चांगल्या संधी आहेत.
\B- योगेश पाटील, \Bउपसंचालक, व्यवसाय शिक्षण व प्रशिक्षण संचालनालय (डीव्हीईटी)