ठाण्यातील आठवीत शिकणाऱ्या दोन विद्यार्थिनींना आंतरराष्ट्रीय स्तरावर रौप्य पदक..‌. खास आहे हा प्रोजेक्ट

December 27, 2020

कोरोनाच्या काळात लॉकडाउन सुरु असल्याने जिम बंद होत्या. त्यामुळे अनेकांनी आपल्या तब्येतीसाठी सर्वात सोपा उपाय म्हणून सायकल चालविण्यावर भर दिला होता. सायकलचा वाढता वापर लक्षात घेऊन ठाण्यातील आठवीत शिकणाऱ्या दोन विद्यार्थिनींनी सायकल चालवता-चालवता मोबाईल चार्जिंग करण्याचा प्रोजेक्ट तयार केला. त्यांच्या या प्रोजेक्टने आंतरराष्ट्रीय स्तरावर रौप्य पदक पटकाविले आहे.

मागील महिन्यात इंडोनेशिया येथे झालेल्या 'इंटरनॅशनल सायन्स इन्वेन्शन फेअर' या जागतिक दर्जाच्या स्पर्धेत या दोघींना रौप्य पदक मिळाले आहे. जगभरातून चाळीस देशांमधून साडेतीनशेपेक्षा जास्त प्रोजेक्ट या स्पर्धेत सहभागी झाले होते. सध्या इंडोनेशियाला जाणे शक्य नसल्याने तिथल्या परीक्षकांनी ऑनलाईन पद्धतीने या दोघींच्या प्रोजेक्टचे परीक्षण केले. त्यात या दोघींनी यश संपादित केले आहे.

आठवीत शिकणाऱ्या त्या दोन मुली म्हणजे गायत्री बेडेकर आणि अमृता बापट. या मुलींनी घरबसल्या सायकलिंग करता करता मोबाईल किंवा बॅटरीवर चालणाऱ्या वस्तू चार्ज करता येतील असे मॉडेल बनविले आहे. गायत्री आणि अमृता यांनी सायकलिंग करुन फिट राहण्यासोबतच मोबाईल चार्ज करुन वीज वाचविण्याकडे देखील लक्ष वेधले आहे. बरेच जण जिममध्ये जावून सायकल चालवितात. तेथेही हे मॉडेल बसवून मोठ्या प्रमाणात वीज बचत करता येईल. नैसर्गिक आपत्तीच्या ठिकाणी जिथे विज उपलब्ध नसते अशा ठिकाणी या मॉडेलचा सर्वात जास्त उपयोग होवू शकतो, आणि हाच आमचा महत्त्वाचा उद्देश असल्याचे दोघीही सांगतात.