अॅपद्वारे घ्या मुलांच्या दातांची काळजी

म.टा. खास प्रतिनिधी, मुंबई
दातांचे आरोग्य राखण्यासंदर्भातील योग्य प्रकारची माहिती देण्यासाठी मुंबईतील सरकारी दंत कॉलेजातील डॉक्टरांनी अनोखे अॅप तयार केले आहे. पेडोडोण्टिक्स ( Pedodontics) नावाच्या या अॅपद्वारे शून्य ते १२ वयोगटातील मुलांच्या दातांची वाढ, समस्या आणि वैद्यकीय उपचारांबद्दल माहिती देण्यात येणार आहे. मौखिक आरोग्यासह मुलांच्या हृदयाचे ठोके, रक्तदाब इत्यादीबद्दलही माहिती या अॅपच्या माध्यमातून मिळणार आहे.
दाताच्या आरोग्यासंदर्भातील योग्य माहिती नसल्याने त्यांकडे दुर्लक्ष होते. दात किडून दुखायला लागले की, वेदना असह्य होतात व तेव्हा त्यांच्या स्वच्छतेचे महत्त्व लक्षात येते. अशावेळी मुलांना दात येतात, तेव्हाच त्यांची काळजी घेण्याचा सल्ला या अॅपद्वारे देण्यात आला आहे. पालकांनाच नव्हे तर डॉक्टरांनाही त्यातून मार्गदर्शन मिळणार आहे. दातांची उपचारपद्धती, औषधांचा डोस यासंदर्भातील माहिती या अॅपवर एका क्लिकने मिळणार आहे.
दंत कॉलेजात दररोज बाह्यरुग्ण विभागात ८० ते १०० बालरुग्ण येतात. यातील किमान ५० रुग्णांमध्ये दात किडण्याची समस्या असते. त्यामुळे लहान मुलांच्या दातांचे आरोग्य सांभाळण्याच्या दृष्टीने हे अॅप मदतगार ठरणार आहे. मुलांच्या वाढीनुसार त्यांच्या दातांची संख्या, ब्रश करण्याची पद्धती याबद्दल यावर माहिती मिळेल. सध्या हे अॅप केवळ अँड्रॉइडसाठी गुगल प्ले स्टोअरवर आहे, पण लवकरच ते आयफोनवरही उपलब्ध होणार आहे.
- डॉ. सय्यद आबार